တန်ခိုးနှင့် ပက်သက်လို့ ကျမ်းဂန်များမှာတော့ နိပ္ဖတ္တိဝသေန ဣဇ္ဈတီတိ ဣဒ္ဓိ- မိမိအလိုရှိတာ မှန်သမျှ ပြီးစီး ပြည့်စုံစေတ တ်လို့ တန်ခိုး ခေါ်ပါသတဲ့၊ လူတစ်ချို့ကတော့ မြေလျိုး မိုးပျံနိုင်တာလောက်ကိုပဲ တန်ခိုးလို့ သိထားကြတယ်၊ အဲဒီထက်မ ကပဲ ဖြစ်နိုင်လျင် တန်ခိုးနှင့်ပက်သက်တာ မှန်သမျှ ဖြစ်နိုင်တာတွေကို သိထားလေ ကောင်းလေပါ၊ အခုခေတ်နောက် ပိုင်းမှာ magic လို ဟာ မျိုးတွေကိုလဲ တန်ခိုးလို့ ထင်နေတတ်ကြတယ်၊ စက်လှည့်၊ လက်လှည့်၊ ဥုံ ဖွ ၊ အပ် ချလောင်း ဘာဖြစ်စေ ညာဖြစ်စေ စတာေ တွ ကိုလည်း ရောထွေးကာ ထင်မှတ်တတ်ကြပြန်တယ်။ အခုလဲ တန်းခိုးအကြောင်းတွေကို ညီငယ်တစ်ယောက်က သိလိုပါတယ် ဆိုလို့ ဖော်ပြလိုက်ပါတယ်။
တန်ခိုး ဆိုတာကတော့ အမျိုးမျိုး ရှိတတ်တယ်၊ potential ,natural, power, supreme power, super natural power စသည်ဖြင့် ပုဂ္ဂိုလ်အလိုက် အမျိုးအစား ကွဲပြားသွားမယ်လို့ ထင်ပါတယ်၊ သို့သော်လည်း ကိုယ်လက်လှမ်း မမှီတဲ့အရာမျိုး၊ မနိုင်နင်းတဲ့အရာမျိုးမို့ အတွင်းကျကျ သိနိုင်ဖို့တော့ ခဲယဉ်းမှာပါ၊ ဥပမာအနေနဲ့ ပြောရရင် မူလတန်းကျောင်းသား တစ်ယောက်ကို (၁၀)တန်းသင်္ချာပုစ္ဆာကို တွက်ခိုင်းသလိုမျိုး ဖြစ်နေပါတယ်၊
ဘာဖြစ်လို့လဲဆိုတော့ တန်ခိုးအဘိဥာဉ် ဆိုတာတွေဟာ ဘုရား ရဟန္တာ ပစ္စေကဗုဒ္ဓါ အရိယာသာဝကကြီးတွေရဲ့ အရာမို့ သိပ်နက်နဲသလို နားလည်နိင်ဖို့ ခက်တယ် လို့ဆိုရပါမယ်၊ ဒါကြောင့်လဲ ယခုခေတ် အနောက်တိုင်းက လူတွေက ဈာန် အဘိဥာဉ်တွေအကြောင်းပြောပြရင် သိပ်အယုံ အကြည်မရှိတတ်ကြဘူး၊ ဘာဖြစ်လို့လဲ ဆိုတော့ သူတို့ကိုယ်တိုင် မသိနားမ လည် သလို သူများတွေ ပြည့်စုံနေတာကိုလဲ မတွေ့ဖူး မမြင်ဖူးတာကြောင့် လက်တွေ့ practice ကိုမှ လက်ခံချင်ကြတဲ့ သူတို့စိတ် ဓာတ်နဲ့ ပြဒါးတစ်လမ်း သံတစ်လမ်း ဖြစ်လို့နေပါတယ်၊
လောကဓံနဲ့ ပက်သက်ပြီးတော့ ဗုဒ္ဓမြတ်စွာက နှလုံးသွင်းနည်းလေး ပေးထားခဲ့တယ်၊ ယောနိသောမနသိကာရ - ကိုယ့်စိတ် ကို အဆင်ပြေအောင် နှလုံးသွင်းတတ်ပါစေ တဲ့၊ ဒီထက်ပြောရရင် အကုသိုလ်အဖြစ်မခံပဲ ကုသိုလ်ဖြစ်အောင်တွေး တတ်ပါစေ၊ ဆိုလိုတာက optimismအကောင်းမြင်ဝါဒ ဖြစ်အောင်လေ့ကျင့်ယူကြ လို့ ပြောတာပါ၊ အာရုံကောင်းတာပဲ တွေ့ တွေ့၊ အာရုံဆိုးတာပဲ ကြုံကြုံ optimism က သိပ်အရေးကြီးပါတယ်၊
တကယ်တော့ ကိုယ်မတွေ့ဖူး မမြင်ဖူးတိုင်း မယုံရ ဆိုလျင်ဖြင့် လူသားတိုင်း အသက်ရှုနေတဲ့ လေကို မြင်ရတာမှ မဟုတ်ပဲ၊ ဒါပေမယ့် ရှိတယ် လို့တော့ လက်ခံနေကြရတယ်၊ ယုံထားကြရတယ်၊ တိုးတက်နေတဲ့ ဒီဘက်ခေတ်ကြီးမှာ open eyes and open mind ပေါ့လေ၊ အတတ်နိုင်ဆုံး ဥာဏ်မျက်စိကို ဖွင့်၊ နားကို စွင့်ပြီး ဖွင့်ထားသော နှလုံးသားဖြင့် ယုံသင့်တာကို ယုံပြီး မယုံသင့်တာကို မယုံကြည်ပဲ နေဖို့ လူတိုင်းမှာ လွတ်လပ်စွာ တွေးခေါ်နိုင်ခွင့်၊ ယူဆပိုင်ခွင့် ရှိနေကြပါပြီ၊
သို့သော် မြင်သမျှ ကြားသမျှတွေကို ဦးနှောက်ထဲ ထည့်နေလို့ကတော့ ကိုယ့်ဦးနှောက်က အမှိုက်ပုံးလို ခဏပြည့်သွားမှာ ပါပဲ၊ ကောင်းတာတွေရော၊ မကောင်းတာတွေရော၊ ကုသိုလ် အကုသိုလ်တွေ ရောထွေးပြီး ဘာမှ သေသေချာချာ မဆုံးဖြတ် နိုင် ဖြစ် သွားနိုင်ပါတယ်၊ ဒီတော့ အမှန်တရားကို ရအောင် ရှာမယ်၊ ငါ့စိတ်ကို ကုသိုလ်ဖြစ်အောင် တွေးမယ်၊ နေမယ် ဆိုရင်ဖြင့် ဘ၀မှာနေရတာ နေပျော်တယ်လို့ သတ်မှတ်ရမှာပါ။ အရာရာတိုင်းကို pessimism အနေနဲ့ အဆိုးမြင်နေမယ် ဆိုရင်တော့ ကိုယ့်ဘ၀လမ်းကြောင်းလဲ တိမ်းစောင်းသွားမှာ မလွဲဧကန်ပါပဲ။
နောက်တချက်အနေနဲ့ ဘ၀လမ်းကြောင်း လမ်းမှန်ပေါ်လျောက်နိုင်ဖို့ အထူးသဖြင့် အခုလို magic ဆန်ဆန် တန်ခိုး အကြောင်း အဘိဥာဉ်အကြောင်းတွေကို လက်ခံနိုင်ဖို့ ကိုယ့်မှာ ဘာသာရေး အခြေခံ ဗဟုဿုတအသိ ပညာတွေ အထိုက် အလျောက် ရှိထားဖို့ လိုအပ်ပါမယ်၊ အဲလို အခြေခံလောက်မှ မရှိရင် ဒါတွေက လက်ခံနိုင်စရာ မရှိဘူး၊ ယုတ္တိမရှိဘူး ဆိုပြီး nihilism နတ္တိက၀ါဒ ၊ သုည၀ါဒ၊ non religion ဘုရားမဲ့တရားမဲ့ဝါဒ ဖြစ်သွားတတ်ပါတယ်။
စာပေကျမ်းဂန်များလာ တန်ခိုးတော် ( ၁၀ ) မျိုး
၁။ အဓိဋ္ဌာနာ ဣဒ္ဓိ - မိမိတစ်ယောက်ထဲ ဖြစ်ပါလျက် ပုံစံတူ ၁၀ ယောက်ဖြစ်အောင်၊ အယောက်တစ်ရာဖြစ် အောင်၊ အယောက်ပေါင်း တစ်ထောင် တစ်သောင်း ဖြစ်အောင် စသည်ဖြင့် မိမိအလိုရှိသလောက် ဖန်ဆင်းနိုင် သော တန်ခိုး ဖြစ်သည်။
( အရှင်စူဠပန္ထက ရဟန္တာမထေရ်ကဲ့သို့ ဆွမ်းစားလာပင့်သော ဒကာမျက်စိလည်အောင် ပုံစံတူ အယောက်ပေါင်း တစ်ထောင်ကို ဖန်ဆင်းထားခြင်းမျိုးဖြစ်သည် )
၂။ ၀ိကုဗ္ဗနာ ဣဒ္ဓိ - ပင်ကိုယ်ရုပ်အသွင်ကို စွန့်လွှတ်ကာ နဂါးအသွင်၊ ဂဠုန်အသွင်၊ လူအသွင်စသည်ဖြင့် မိမိ လိုချင်သလို ပုံစံကို ဖန်ဆင်းနိုင်သော တန်ခိုးဖြစ်သည်။
( နန္ဒောပနန္ဒနဂါးမင်းကြီးကို နှိမ်နှင်းသော အရှင်မောဂ္ဂလာန်၏ ဖန်ဆင်းခြင်းမျိုး၊ ဘုရင် အဇာတသတ်ကို စည်းရုံးသိမ်း သွင်းသော အရှင်ဒေ၀ဒတ်လိုခန္ဓာကိုယ်မှာ မြွေတွေ ပတ်ထားသလိုမျိုးစသော ဖန်ဆင်းခြင်းများ ဖြစ်သည်။
၃။ မနောမယာ ဣဒ္ဓိ - မိမိခန္ဓာကိုယ်နှင့် ပုံစံတူ ဣဒ္ဓိမယ ခန္ဓာကိုယ်ကို ဖန်ဆင်းနိုင်သော တန်ခိုးတော် ဖြစ်သည်။
( မြတ်စွာဘုရားရှင်သည် တာဝတိံသာနတ်ပြည်တွင် ၀ါတွင်းသုံးလပတ်လုံးနေ့မနား ညမနားအဘိဓမ္မာ ပဋ္ဌာန်းတရား တော် ကို ဟောကြားတော်မူရာတွင် နတ်တို့အတွက် မိနစ်ပိုင်းမျှ ဖြစ်သော်လည်း လူသားဖြစ်သော ဘုရားရှင် အတွက်မူ အစာအာဟာရ မဘုန်းပေးပဲ မဖြစ်နိုင်ရကား ပုံတူနိမ္မိတ ဘုရားရှင်ကို ဖန်ဆင်းပြီး တရားကို ဒီနေရာမှ ဒီနေရာအထိ ဟောခဲ့စေသတည်း ဟု အဓိဋ္ဌာန်ကာ ကိုယ်တော်တိုင်က မြောက်ကျွန်းသို့ ကြွကာ ဆွမ်းဘုန်းပေးတော်မူပြီး တဖန်ပြန်လည် ဟောကြားတော်မူခဲ့သည်၊ နတ်ဗြဟ္မာတို့၏ စိတ်တွင်ကား ဘုရားရှင်တ ပါးတည်း ဟောကြားနေသည် ဟု မှတ်ထင်နေကြ ၏၊ ပြန်ရောက်ပါမှ တရားတော်ကို ရောက်သည့်နေရာမှ ဆက်လက် ဟောကြားတော်မူသည်၊
အရှင်သာရိပုတ္တရာ သည်လည်း လူ့ပြည်မှတက်ကာ ဘုရားရှင် ဆွမ်းဘုန်းပေးနေစဉ်အတွင်း ၀တ်ကြီး ၀တ်ငယ် ကို ပြုစု ပေးတော်မူ၏၊ ထိုအချိန်လေးအတွင်းမှာပင် သာရိပုတ္တရာ ငါဘုရားကတော့ ဒီနေ့မှာ အဘိဓမ္မာတရားကို ဒီနေရာကနေ ဒီနေရာ အထိ ဘယ်လို ဘယ်လို ဟောထားခဲ့တယ် ဆိုပြီး အကျဉ်းဆုံးနည်းကို လမ်းပြညွှန်တော်မူ၏၊ ထိုအကျဉ်းဆုံးကိုပင် အရှင် သာရိပုတ္တရာကလည်း သူဥာဏ်ရှိသလို ချဲ့ထွင်ကာ ရှေးအခါက လင်းနို့သား ငါးရာ အဖြစ်ဖြင့် အဘိဓမ္မာတရားကို နာဖူးခဲ့သော ပါရမီအထုံရှိခဲ့သည့် တပည့်သားရဟန်းနောက်လိုက် ငါးရာကို တဆင့်ပြန်လည်ဟောကြားခဲ့သည်။
ဝါကျွတ်သည်နှင့်တပြိုင်နက် ဘုရားရှင်လည်း အဘိဓမ္မာပဋ္ဌာန်းတရားတော် ကြီး ပြီးဆုံးသည်၊ လူ့ပြည်ကရဟန်းငါးရာလည်း တရားထူးရတော်မူကြသည်၊ တကယ့်အံ့သြစရာပါပေ၊ ယနေ့စာရေးသူတို့ သင်ယူလေ့လာနေကြရသော အဘိဓမ္မာ ပဋ္ဌာန်းတရားေ တ်ာများသည် အရှင်သာရိပုတ္တရာ ဟောကြားတော်မူခဲ့သော မကျဉ်းမကျယ်နည်းမျှသာတည်း၊ အကယ်၍ သာ ဘုရားရှင်ဟောခဲ့သလို အကျယ်တ၀င့် သင်ယူရပါမူ မည်သို့မျှ ဆုံးခန်းတိုင်မည် မဟုတ်ဟု မှတ်ထင်ရပေသည်။ အဘယ့်ကြောင့်ဆိုသော် ဥာဏ်ရှိလျင် ရှိသလောက်၊ ချဲ့ထွင်နိုင်လျင် ချဲ့ထွင်နိုင်သလောက် နည်းပေါင်းများစွာ နယ်ပယ် ပေါင်းများစွာ ကျယ်ဝန်းသောကြောင့် ဖြစ်ပါသည် )
၎။ ဥာဏ၀ိပ္ဖါရာ ဣဒ္ဓိ - ဘုရားရှင်တို့အတွက် အရဟတ္တမဂ်ဥာဏ်ကို မရမီအချိန်လေးအထိ အတိတ်ဘ၀များစွာ က ဖြစ်ပျက် ခဲ့သောအကြောင်းအရာများ၊ ဘ၀ဖြတ်သန်းရပုံများ၊ မည်သူများနှင့် ရေစက်ဆုံခဲ့သည်များ၊ ဘယ်ဘ၀မှ သေလွန်ကာ ဘယ်ဘ၀ သို့ရောက်ရသည် စသည်ဖြင့် ပိုက်စိတ်တိုက်တရစပ်ဖြစ်စေ၊ ခုန်ကျော်၍ဖြစ်စေ၊ အလယ်က ဖောက်ထွက်၍ဖြစ်စေ လိုအပ်သလို ကြံစည်ကာမျှဖြင့် ဥာဏ်ဖြန့်ကျက်ခါ မှတ်မိသိရှိနိုင်ခြင်း ဟူသော တန်ခိုး တော်ဖြစ်သည်။
( မဟာသာဝက၊ သာဝကတို့နှင့် ဇာတ်တော်များတွင် ပါဝင်သော ဈာန်ရ ရသေ့များသည်လည်း ကမ္ဘာပေါင်း၄၀၊ ကပ်ပေါင်း ၄၀တိုင်တိုင် ဥာဏ်ဖြန့်ကျက် ကာ မှတ်မိနိုင်၏၊ သို့သော် ဘုရားရှင်များလို မဟုတ်၊ ခုန်ကျော်ဖြန့်ထွက်ကာ မမြင် နိုင် မတွေး နိုင်ကြပေ )
၅။ သမာဓိဝိပ္ဖါရာ ဣဒ္ဓိ - ဈာန်ကို မရခင်အချိန်တွင်းမှာ ဖြစ်စေ၊ ဈာန်ကို ၀င်စားဆဲခဏမှာ ဖြစ်စေ၊ ဈာန်မှ ထမြောက် သည့်အ ခါမှာဖြစ်စေ မိမိအလိုရှိသည့်အတိုင်း သမာဓိကို ဖြန့်ကျက်ပြီး ကိလေသာ နီဝရဏတို့ ဘယ်လို ဘယ်ပုံ ကင်းကွာ သွားသည် စ သည်ဖြင့် သိရှိနားလည်နိုင်သော တန်ခိုးတော်ဖြစ်သည်။
၆။ အရိယာ ဣဒ္ဓိ - အကယ်၍ မိမိရောက်ရှိနေသော ပတ်ဝန်းကျင်သည် စက်ဆုပ်ဖွယ် ပဋိကူလ အာရုံဖြစ်နေပါ စေ၊သုဿာန်သချိုင်း စသော အလောင်းကောင်များ ပြည့်နှက်နေခြင်းစသော ရွံရှာဖွယ် ဖြစ်နေပါစေ၊ စက်ဆုပ်စရာ မဟုတ်၊ ရွံစရာမဟုတ် လူတိုင်း ခန္ဓာကိုယ်နှင့် ငါ့ခန္ဓာကိုယ်လဲ ဒီလို သဘောတွေချည်းပါပဲ ဟု နှလုံးသွင်းကာ အရိယာတို့၏ စိတ်ထားဖြင့် နေနိုင်သော တန်ခိုး တစ်မျိုး ဖြစ်သည်။
၇။ ကမ္မ၀ိပါကဇာ ဣဒ္ဓိ - မထင်မှတ်သော ကံကြောင့် ဖြစ်ရသော ကံက အကျိုးပေးလာသောကြောင့် ရရှိလာသော ဘ၀၀ယ် တကူးတက အားစိုက်စရာ မလိုပဲ သဘာဝတရားအရ ရရှိလာသော တန်ခိုးမျိုးဖြစ် သည်၊
( ငှက်သတ္တ၀ါများသည် သဘာဝတရားက အလိုလို ဖန်တီးပေးထားသောကြောင့် ကောင်းကင်ပျံနိုင်ခြင်း၊ ပရလောကမှ မကောင်းဆိုးဝါးများ စာပေလာစကားအရ မကျွတ်မလွတ်ဖြစ်နေသော တစ္ဆေ သရဲ စုန်း ပြိတ္တာ မှင်စာ စသူတို့၏ ကိုယ်ရောင်ေ ဖျာက် နိုင်ခြင်း စသော အစွမ်းများဖြစ်ကြသည်။ )
၈။ ပုည၀တော ဣဒ္ဓိ - လွန်ကဲသော ဘုန်းကံကြီးမားသူတို့၏ တန်ခိုးအစွမ်းဖြစ်သည်။ ( ဥပမာ စကြာမင်းသည် ခရီးလှည့်လည်သောအခါ မိမိနောက်လိုက်နောက်ပါ ဆင်တပ်၊ မြင်းတပ် ရထားတပ်၊ ခြေလျင်တပ်၊ စသည်ဖြင့် နောက်ပါ ဗိုလ်လူအားလုံး မင်းကြီးနှင့်အတူ လိုက်နိုင်ပြီး ကောင်းကင်ပျံနိုင်ကြသည် ဟူ၏၊
နောက်တဖန် သူနေဖို့ရန် နတ်များက ဘုံဗိမာန်ဆောက်လုပ်ဖန်ဆင်းပေးရသော၊ သူနှင့်သင့်တော်သော မိဖုရားအတွက် မြောက်ကျွန်းသူကို ခေါ်ဆောင်ကာ ထိမ်းမြားပေးရသော ဇောတိကသူဋ္ဌေးလို ဘုန်းကံရှိသူမျိုး၊ မိမိ နေထိုင်ဖို့ရန် အိမ်ဝင်း အတွင်း ၀င်လိုက်သည်နှင့် အိမ်နောက်ဖေးမှ သူ့အတွက် အတောင် ၆၀ အမြင့်ရှိသော ရွှေသားရွှေတောင်ကြီး ပေါ်ပေါက် လာသော ဇဋိလသူဋ္ဌေး လို သူတို့အတွက် ဖြစ်ပေါ်လာသော တန်ခိုးမျိုးဖြစ်သည် )
၉။ ၀ိဇ္ဇာမယာ ဣဒ္ဓိ -၀ိဇ္ဇာဓိုရ် ၊ ဇော်ဂျီတို့၏ အင်း အိုင် ခါးလှည့်၊ လက်ဖွဲ့ မန္တရား၊ မန္တာန် တို့၏ အစွမ်းကြောင့် ၄င်း၊ ဓာတ် လုံး ဆေးလုံးတို့၏ အစွမ်းကြောင့်၎င်း ကောင်းကင်ပျံနိုင်ခြင်း စသော တန်ခိုးမျိုးဖြစ်သည်။
၁၀။ တတ္ထ တတ္ထ သမ္မာပယောဂပစ္စယာ ဣဇ္ဈနဋ္ဌေန ဣဒ္ဓိ - ကိစ္စကြီးငယ် တို့တွင် နည်းလမ်းဟူသော ဥပါယအားဖြင့်၎င်း၊ ဥာဏ်ရှိသလို အသုံးချတတ်သော ဥာယ အားဖြင့်၎င်း၊ လိုအပ်လျင် လိုအပ်သလို အားထုတ် ခြင်းကြောင့် ဒီဘ၀ ဒီခန္ဓာဖြင့် တစ်သံသရာလုံး ပါလာ ကိန်းအောင်းလာခဲ့သော ကိလေသာတို့ကို ၀ါသနာအငွေ့နှင့်တကွ ဓလေ့ ၊ အထုံဓာတ်များပါမကျန် ရှင်းရှင်း ပယ်သတ်တော်မူနိုင်ခြင်းဟူသော တန်ခိုးတော် ဖြစ်သည်။
သမ္မာသမ္ဗုဒ္ဓ ဘုရားရှင်မှန်သမျှတို့သည် တန်ခိုးအားလုံး ပြည့်စုံတော်မူကြသော်လည်း ( ၉ ) နံပါတ် ၀ိဇ္ဇာဓိုရ် ဇော်ဂျီတို့၏ တန်ခိုးကို ဘယ်လိုနည်းနှင့်မျှ အသုံးပြုတော်မမူကြကုန်။ ဤသည်ကား ဗုဒ္ဓစာပေ ကျမ်းဂန်များတွင် လာရှိသော တန်ခိုးတော် များ ဖြစ် ကြပါသည်။
အချုပ်ဆိုရလျင် ဗုဒ္ဓဘာသာဝင်တို့၏ ဘာသာရေးအမြင်အရ လမ်းကြောင်းရှိနေသောကြောင့် ရှိခဲ့သောကြောင့် ရှေးရှေး လူများလည်း လျောက်လှမ်းခဲ့ဖူးသောကြောင့် ယုံကြည်လက်ခံနိုင်ကြသည်၊ ဘာသာရေးအသိဥာဏ် နုနယ်သေး သော၊ သဒ္ဓါ ပညာ နှစ်မျိုးကို balance ဖြစ်အောင် မချိန်ညှိတတ်သော၊ အနောက်တိုင်း စာပေ၊ သိပ္ပံပညာများကို အားကျလက်ခံပြီး လက်ေ တွ့ဖြစ် မှ ယုံကြည်ချင်ကြသော၊ ဣဒမေ၀ သစ္စံ၊ ငါပြောတာ ငါသိထားတာ ငါလေ့လာထားတာမှ အမှန်ပဲ၊ မောဃမညံ - သူများတွေ ပြောတာ အချည်းနှီး၊ မှားတယ်၊ လက်မခံနိုင်ဘူး ဟုယူဆ နေသူများအတွက်တော့ အဖြေမရှိသေးသော ပဟေဠိ ပုစ္ဆာများ ဖြစ်နေမည် ဟုသာ စေတနာစကားဖြင့် ပြောကြား အသိ ပေးလိုပါသည်။
မေတ္တာဖြင့်
အရှင်သုနန္ဒာလင်္ကာရ M.A ( ပန်းကမ္ဘာ )
Date.9.Sep.2011
စာညွှန်း။ ။ ၀ိသုဒ္ဓိမဂ် ၂၊ ဣဒ္ဓိဝိသေသနိဒ္ဒေသ၊
ပဋိသမ္ဘိဒါမဂ္ဂ အဋ္ဌကထာ၊ ဣဒ္ဓိကထာ၊
သီလက္ခန္ဓ၀ဂ္ဂပါဠိတော်၊ ပေါဋ္ဌပါဒသုတ်၊
